E. L. James

“Pesëdhjetë hijet e Greit”

Përktheu: Manushaqe Bako

Botoi: “Dritan”

Pak ditë pasi ka ardhur në stendën e titujve të rinj, libri “Pesëdhjetë hijet e Greit” ka tërhequr menjëherë interesin e lexuesve. Autorja e trilogjisë së famshme erotike “Pesëdhjetë hijet”, britanikja E.L. James, ka mbërritur në gjuhën shqipe me romanin e saj bestseller. Historia romantike dhe çlodhëse nis me një marrëdhënie në dukje të pamundur mes një studenteje të re dhe një biznesmeni të famshëm, ku ajo zbulon dëshirat e saj, por edhe të fshehtat e shumta të tij. Anastasia Still shkon të intervistojë biznesmenin e suksesshëm Kristian Grei, ajo gjen një burrë tepër tërheqës dhe frikësues. Teksa nisin një histori dashurie pasionante, Ana zbulon më shumë mbi dëshirat e saj, si edhe mbi sekretet e errëta që Grei mban të fshehura.

Martin Camaj

“Poezi”

Përgatiti: Bardhyl Demiraj

Botoi: “Onufri”

“Rruga e poezisë së tij është rruga e mundimshme e kthimit në atdhe të një autori të penguar nga të gjithë. Ai vjen vetëm, me gjuhën e vet, me gegnishten e larguar nga vetë gegnishtja e ndaluar, me poetikën e vet të larguar nga tradita shkodrane, edhe kjo e ndaluar, me poezinë e tij moderne e vetjake, krejt të huaj për poezinë vokalike, për tërmetin verbal, me shumë epiqendra, për poetikën kolektive të realizmit socialist. Në këtë kënd ajo ka karakteristikat e fisnikërisë që Montale i njeh poezisë, plotësisht e padobishme, por asnjëherë e dëmshme”, shkruan studiuesja Dhurata Shehri në parathënien e këtij botimi.

Laura Shaine Cunningham

“Shpirtra të bukur”

Përktheu: Mimoza Backa

Botoi: “Max”

Gjashtë shoqe rreth të 30-ave që jetojnë në Nju Jork, takohen një mbrëmje në apartamentin e njërës prej tyre për të festuar paralindjen e një bebeje. Janë gjashtë gra profesioniste, që jetojnë në një qytet dhe luftojnë për përzgjedhjet e tyre femërore. Nën flakën e qirinjve, ato tregojnë për përjetime të historive, të dashurive sekrete dhe miqësive të krijuara. Leximi i këtij romani, të bind të kesh vlerësim për veten, miqtë më të mirë, meshkujt, të dashurit e një nate dhe, pa diskutim, për dashurinë dhe partnerin e jetës.